సమస్యాపూరణం-౩

ఏకదంతుడౌచు నినుమడించిన దీప్తి
ఘనత జూపి పిదప గణపతియయి
ముదముగూర్చువాని మోహనాంగుని యాకొ
మరుని ముద్దులాడె గిరికుమారి.     201.(31-03-13)

సురవరులకు సచ్ఛుభకరి
నిరతంబును శాంతమూని నిర్మలమతులై
తిరిగెడు భక్తుల కభయం
కరి సింహమునెక్కి దైత్యగణముల దునిమెన్.202.(01-04-13)

కలలోనైనను దేవుని
దలపక యిల్లాలు, సుతులు, తనవారనుచున్
పలుతెరగుల స్వార్థంబున
కలకాలము బ్రతుకువాడు కామాతురుడే.203(02.4.13) 

స్వార్థబుద్ధితోడ సర్వంబు భక్షించి
నాట్యమాడువాడు నాయకుండు,
కలియుగంబులోన కలుషాత్మకుండౌచు
పాడు పనుల జేయువాడు ఘనుడు 204(03.04.13)

ధరపయినొక్కచోట నవధానము సాగుచునుండె, దానిలో
నరయగ పృచ్ఛకుండొకడు హర్షమునందుచు శేముషీధురం
ధరుడయి తేజరిల్లు నవధానికి నిచ్చె సమస్య నీవిధిన్
నరకుడు సంపె గృష్ణుని సనాతనధర్మము రక్షసేయగన్. 205(04.04.13)

నిగమంబుల దూషించుట
తగినది కాదయ్య, వేదధర్మము మనకున్
తగునని దుర్మార్గుండగు
జగపతి యను సుతునితోడ శర్మార్యుడనెన్.  206(05.04.13) 

ధ్వనిచేతన్ రసభంగమౌను పరమార్థంబెల్ల వ్యర్థంబగున్
మునివృత్తిన్ గొనియున్నవాడ కనుకన్ మూర్ఖాగ్రణుల్! పొండు మీ
రనయం బిచ్చట గోలసేయకుడురా! యంచాడువాడేవిధిన్
ముని కానేరడు, ధీరతన్ గనడికన్ మోదింపలేడెప్పుడున్.  207         
                                                                      06.04.2013

ఘనులౌ చోరుల బట్టువేళ, సుఖముల్ కాంక్షించి సంఘంబునన్
ధనరాశుల్ భుజియించువారి నిలలో దండించు సత్కార్యమం
దనయంబున్ విధిగా రహస్యమె తగున్, హర్షంబు చేకూర్చెడున్
ధ్వనిచేతన్ రసభంగమౌను పరమార్థంబెల్ల వ్యర్థంబగున్ .    208           
                                                                          06.04.2013

కుంతి, మగడు, శూలి, కొడుకు, వాలి.
 
దివిజాధిపతి గోర కవచాదికములిచ్చు
       దానకర్ణుని గన్న తల్లి యెవరు?
కర్ణుని మాతకు కమనీయచరితకు
       పాండురాజేమౌను? పలుకవలయు,
ఆకుంతి కొమరున కర్జునాఖ్యునకిచ్చె
       పాశుపతాస్త్రంపు భాగ్యమెవడు?
మఘవున కేమౌను మహితతేజుండౌచు
        వైభవంబును గన్న ఫల్గునుండు?
"వాలి యుండె నౌర! బాణాలశయ్యపై
భీష్ము" డన్నమాట విన్నయపుడు
మొదటిపదమదేది మోదంబునం జూడ?
కుంతి, మగడు, శూలి, కొడుకు, వాలి.209.  07.04.13

సంగీతజ్ఞులు, సజ్జను
లొంగోలున నుండు జను, లయోగ్యులు స్తుతికిన్
సంగతి గ్రహియించక బహు
భంగుల నవ్వారి దూరు వారలు భువిలో 210(8.413)

వెన్నుని సారథిగా గొని
క్రన్నన చేబూని భవ్య గాండీవంబున్
మన్నిక నేగెడు ఫల్గును
కన్నను శూరుండు ముజ్జగంబుల గలడే?211

మన్నించబోను నేనని
పన్నెను సత్యాగ్రహంబు బహువిధములుగా
నెన్నంగ నికను గాంధీ
కన్నను శూరుండు ముజ్జగంబుల గలడే? 212(9.4.13) 

ఔర! యొకచోట కార్యాలయంబునందు
తమ్ముడధికారియయ్యెను దానిలోన
నన్న బంట్రోతు మొదటనె, యెన్న నచట
ననుజు డగ్రజుడాయె తానాదరమున.  213(10.4.13)

వత్సరారంభ మీనాడు వైభవముగ
బంధుమిత్రుల రాకచే బహువిధాల
సుఖము కలుగును సర్వత్ర శుభము లివియె
కాదు, సంతోషదాయక మీదినమ్ము  214(11.4.13)

కరము వికసించి నైర్మల్య మరయగలవు
మారుతిని గొల్చువారల మతులు, చెడును
హృదయమందున్న కలుషంబు, ముదము నిత్య
మబ్బు ననుమాట నిక్కమీ యవనిలోన.215(14.4.13)

అరయగ తనమానసమున
హర!హర! తోరంపుభీతి యనవరతంబున్
తిరుగుచు నున్నందున పలు
మరు నిం బూజించ మేలు మాతామహికిన్. 216(15.4.13)

యశము ధనము నిచ్చు, వ్యవహారవిదు జేయు
శుభము లందజేయు, సుందరివలె
బోధచేయుచుండు పుడమిని కాన క
వనము సుఖము నొసగు జనుల కెపుడు. 217(20.4.13) 

భారతంబున కన్యాకుమారికెపుడు
దర్శనార్థులు పలువురు తరలివత్తు
రచట పౌర్ణమినాడెంతొ యద్భుతముగ
సూర్యచంద్రుల నొకచోట జూడగలము. 218(21.04.13)

సెలవులివ్వంగ బళ్ళకు నెలకుమించి
హర్షమందుచు బాలకులాడుచుంద్రు
జాలమికనేల? నక్షత్రశాలలోన
సూర్యచంద్రుల నొకచోట జూడగలము  219(21.4.13)

కులుకుచుండి యొక్క జలరాశితీరాన
మత్స్యశాబకంబు మరలమరల
నెగురుచుండ చూచి యెటనుండియో ఒక్క
బకము వచ్చి వాలి ప్రాణము గొనె. 220.(23.04.13)




స్వామి కృపామయుండు క్షితిజాతను పంపుము నీకు మేలగున్
రామపదాబ్జమే శరణురా యని పల్కెను, రావణుం డహో
యేమిర! రాక్షసోత్తమున కీవిధి చెప్పెదు వానరాధమా
క్షేమము చూడబోవనియె చిన్మయరూపుని తూలనాడుచున్.  
                                                                    221.(24.4.13)
నిశినొక్క మద్యపానుడు
శిశుపాలుడు ప్రాణదాత శ్రీకృష్ణునకున్
దశకంఠుడాత్మజుండగు
దశరథనందనునకనియె తన్మయుడగుచున్.  222(25.4.13)

భవబంధంబును ద్రుంచు బెంచు జనకా! భాగ్యంబు నిత్యంబుగా
జవసత్వంబులనిచ్చు కూర్చు యశముల్ సర్వార్థముల్ తీర్చు మా
నవసంఘంబున కిద్ధరిత్రిననుచున్ నానాప్రకారంబు కే
శవతత్త్వం బెరిగింప తండ్రి వినెనా సత్పుత్రు సద్వాక్యముల్.  
                                                                       223.(28.4.13) 

కారుణ్యాత్మకుడై యనాథజనసంఘాలన్ మహాప్రీతితో
చేరంబిల్చుచు, వారికన్నిగతులన్ క్షేమంబు చేకూర్చుచున్
ధీరత్వంబును నేర్పునట్టి ఘనునిన్ దీనార్థిసౌఖ్యప్రసా
దా! రా రమ్మని పిల్చె నొక్కసతి భర్తన్ ప్రేమ పొంగారగన్.  
                                                                         224.(2.5.13) 

ఎరుగంబోవక పుత్రియంచు నపుడా యిందీవరాక్షుండు భీ
కరుడై దానవశక్తితో సుతను వేగన్ జేరె భక్షించగా
నరయంబోయి స్వరోచి శస్త్రహతుజేయన్ నవ్యతేజంబుతో
కరమొప్పారెను వానిదేహము శరాఘాతమ్ముచే నాజిలోన్.  
                                                                          225.(3.5.13) 

అద్దిర! పినాకపాణియు
నిద్దరు సతులున్నవాడె, హితము గడించున్
పద్దెంబుల, కవనంబుల
నద్దేవుని గొల్చువాడు హర్షముతోడన్.  226.(4.5.13)

ఇల నొకతండ్రి కుమారుని
కలయక చెప్పినను వినక నాటలతోడన్
కులుకి పరీక్షలలో నీ
నెల తప్పిన రాజుగాంచి "నెలరాజ"నియెన్.  227.(5.5.13)

బంగ్లాదేశమువార లెప్పుడయినన్ వంగంబు భాషింతు రా
యాంగ్లేయుల్ సతతంబు దాల్తు రిలలో నాత్మాభిమానంబు, నే
డింగ్లీషే పఠియించు నాంధ్రులకహో! యింపార సంతాన మీ
యాంగ్లంబందున "మమ్మి డాడి" యనుటే యాంధ్రాభిమానంబగున్.  
                                                                          228(6.5.13) 

ముదమున నప్సరసలకో
వది నను బెండ్లాడెను బుధవర్యులు మెచ్చన్
సుదతుల్ విందున కిప్పుడు
కదలుండనిపల్కె నొకడు కలలోని కథన్. 229(8.5.13)

ఛాత్రుడొక్కడు గురువర్యు సత్కరించె
నుంగరంబున, జిరునవ్వు లొల్కె బళిర!
గురుని ముఖమున నాతండు కూర్మితోడ
ననుపమంబైన సుఖముల నందుమనియె.  230(9.5.13)


హనుమ నెట్టుల నమ్మె తానవనిజాత?
ముద్రికను జూడ నేమయ్యె ముదితకపుడు?
వానరేంద్రున కేరీతి పలికె సీత?
ఉంగరంబున, చిరునవ్వులొల్కె, బళిర! 231(9.5.13)

రండో బాలకులారా!
పండుగపై సామెతలను పలుకుండనుచున్
పండితు డడుగగ నొక్కడు
"పండుగనాడేల నాకు పాతమగడ"నెన్. 232(29.7.13)

భువనములకెల్ల ప్రభుడౌచు నవనివారి
క్షేమమరయుచు రక్షణ చేయుచుండు
తిరుమలేశుని దర్శించ నరుగుజనుల
మనము శాంతించు నెన్నొ సమస్యలున్న.        
                                                233(31.07.13)

ఎప్పుడు వలసిన నలయక
ముప్పొద్దుల చెంతజేరి ముదమలరంగా
గొప్పదగు భావజాలము
నప్పిచ్చెడువాడు వైద్యుడగుననిరి బుధుల్ 
                                        234(06.08.13)

ఇహము పరమునందు బహువిధ సౌఖ్యంబు
లందజేయుచుండి యనవరతము
నవ్యమైన రామనామామృతంబును
త్రాగి పాడెనంట త్యాగరాజు.235

ఆగస్టు 08, 2013 6:47 AM

చారుగాత్రంబుతో క్షీరసాగరమందు
..........మున్నుద్భవించిన కన్నె యెవరు?
శాత్రవాంతకమైన చక్రాయుధంబుతో
..........బంధమేమున్న దాపడతి కిలను?
ఫాలలోచనుడైన పరమేశ్వరునకేమి
..........హస్తభూషణమౌచు నమరియుండు?
పూర్వకాలమునందు పుడమిపై కర్షకుల్
..........ధాన్య మెందున బోసి దాచువారు?
క్రమము పాటించి యీనాల్గు ప్రశ్నలకును
సూటిగా నుత్తరంబులు చూపుడనిన
చేర్చి చక్కగ నీరీతి చెప్పనగును
లచ్చి, మగనికైదువు, త్రిశూలమ్ము, గాదె.236

ఆగస్టు 12, 2013 2:13 PM

చీకాకు చెంది యరచుట
రోకటిపో, టౌషధము శిరోవేదనకున్
శ్రీకరమగు శాంతంబును
చేకొని విశ్రాంతి గొనుట క్షితివారలకున్    237

సెప్టెంబర్ 26, 2013 5:05 PM 

ఉత్తముండు తానె యున్నతుడన్నింట
అప్పు లేనివాడె, యధముడు గద!
అప్పుచేసియైన గొప్పకు యత్నించు
చుండు వాడు సత్య ముర్విలోన. 238

బొంకులాడువాడు పుణ్యాత్ము డీనాడు,
సత్యవాది యౌను చవట యిలను,
ఒరుల ముంచువాడె యుత్తము డింకేమి
యప్పు లేనివాడె యధముడు గద. 239

సెప్టెంబర్ 27, 2013 10:43 AM
త్రైలోక్యరక్షకుండును, 
శ్రీలన్గురిపించు ఘనుడు, చిన్మయుడగు నా
వ్యాలాభరణుడు, కంఠే
కాలుడు హిమశైలసుతకు కాంతుం డయ్యెన్ 240
సెప్టెంబర్ 28, 2013 6:47 AM      
బారులు దీరిన బొమ్మల  
తీరులు, జాతరలలోన తేరులు, ప్రభలున్ 
కోరిన నృత్యంబులు బా 
జారుల కృత్యములు మనకు సంతోషమిడున్.  
                                                      241

సెప్టెంబర్ 29, 2013 7:39 AM   
 

 

ఔరా! ఛత్తీస్గఢ్లో
తీరగు నృత్యంబు చేయ స్థిరచిత్తముతో
బారులు దీర్చిన యా బం
జారుల కృత్యములు మనకు సంతోష మిడున్ 242
సెప్టెంబర్ 29, 2013

సుస్మిత వదనుడు క్రీస్తీ
క్రిస్మస్ నాడవతరించె, కృష్ణుడు భువిపై
విస్మయము గొల్పి యష్టమి
నస్మద్రక్షణకు జన్మనందెను నాడున్.243

డిసెంబర్ 25, 2013 4:52 AM

కలియుగంబులోన ఘనుడౌచు వెలుగొందు
విత్తమున్నవాడు వివిధగతుల
నీతిదూరుడైన నేతగాయశమందు
చదువురానివాడు శాస్త్రవేత్త.244

శాస్త్రపఠనమేల సంకల్పశుద్ధితో
దీనజనులసేవలోన సతము
మగ్నుడౌచు హరిని మానసంబున నిల్పు
చదువురానివాడు శాస్త్రవేత్త. 245

చదువురానివాడు శాస్త్రవేత్తయటన్న
చదువుకొన్నవాని సంగతేమి
టన్న సత్య మాత డవివేకి యైనచో
వ్యర్థమతని విద్య వసుధలోన. 246

అరయ నుచితమౌనె? తరతమ భేదాలు
చదువురానివాడు, శాస్త్రవేత్త,
నిమ్ను,డున్నతుండు, నిరుపేద, ధనికుండు
సర్వజనులు భువిని సములు గాదె.247

సాధుహృదయులార! సంఘాని కర్థంబు
చిన్న, పెద్ద మరియు స్త్రీలు, పురుషు
లవనివారలైన యన్నిజాతులవారు
చదువురానివాడు, శాస్త్రవేత్త.248

డిసెంబర్ 26, 2013 9:09 AM

కామితవరదుడు దశరథ
రాముడు, విననియ్యకొనడు రామాయణమున్
భూమిన్ నాస్తికు డేలనొ
నామార్చన చేయబోడు, నమ్మడు స్వామిన్.249

డిసెంబర్ 27, 2013 4:43 AM

శంకించక తనువొసగెను
శంకరు డుమకొరకు, పారిజాతము తెచ్చెన్
జంకక కృష్ణుం డప్పుడు
పంకజముఖి సత్యకొరకు పరమప్రీతిన్.250

డిసెంబర్ 28, 2013 6:36 AM

లంకాధిపు విభుడెవ్వడు?
శంకరు డెందులకు మారె? చక్రియు సతికై
జంకక నేమొనరించెను?
శంకరు, డుమకొరకు, పారిజాతము దెచ్చెన్ 251

డిసెంబర్ 28, 2013 12:10 PM 

సురుచిరవర్తన నుండుట
తరుణికి నందమ్ము నొసగు, దలపై కొమ్ముల్
కరుణారాహిత్యంబును
గురుజనధిక్కారగుణము క్రోధం బరయన్.252

డిసెంబర్ 29, 2013 3:42 AM

 కల్మషాలకు నిలయమౌ కలియుగాన
మానవత్వము నశియించి, మమతలుడిగి,
హృదిని విపరీతధోరణుల్ ముదిరినపుడు
భ్రూణహత్యల జేయుట పుణ్యమగును.253

డిసెంబర్ 31, 2013 3:42 AM 

తనకు నాథుడె ప్రత్యక్షదైవమనుచు
విశ్వసించుచు హర్షాన వివిధగతుల
చేరి యాతని పరిచర్య చేయునపుడు
భార్య పదములన్ భక్తితో పట్టదగును.254

జనవరి 02, 2014 9:26 AM

ముక్తి కాంక్షించు నరునకు ముదముతోడ

సకలలోకైకనాథుడై సర్వజగతి
రక్ష చేసెడి దశరథరామవిభుని
భార్య పదములన్ భక్తితో బట్టదగును.255

జనవరి 02, 2014 11:10 AM  

చిత్రమైనట్టి కలవచ్చె చెప్పుచుంటి
వింత లోకంబు కలదొండు వినగ నందు
పురుషులకు వచ్చు గర్భంబు సురుచిరముగ
పెండ్లి కానివారలకె వేవిళ్ళు కలుగు.256

జనవరి 03, 2014 1:12 PM

భద్రాచలమున కేగుచు
బద్రీనాథుండు మిత్రవర్యుని తోడన్
రుద్రా! చెప్పుము నాకనె
హైద్రాబా దెంతదూర మయ్య కడపకున్ 257

జనవరి 04, 2014 4:51 AM

హృద్రోగపీడితుండయి
భద్రుడు వైద్యార్థ మేగవలెనని యిట్టుల్
మద్రాసు మిత్రునడిగెను
హైద్రాబాదెంత దూరమయ్య కడపకున్.258

నిద్రించనేల మిత్రమ!
యీ ద్రవ మొకయింత త్రాగు మీమార్గమునన్
భద్రముగా జేరెదమిక
హైద్రాబాదెంత దూరమయ్య కడపకున్.259

జనవరి 04, 2014 10:55 AM

హరికథను విన్న "కువలయ" అనే ఒక యువతి..

దేవాలయమున చెప్పిన
గోవిందుని కథను విన్న కువలయ కలలో
నావిషయమె స్మరియించుచు
గోవర్ధనపర్వతమును గోమలి యెత్తెన్.260

జనవరి 05, 2014 6:02 AM

శ్రీవాసుడు చిత్రించెను
గోవర్ధనపర్వతమును, గోమలి యెత్తెన్
సేవాభావము జూపుచు
పోవిడిచిన రంగు, కుంచె, పుల్లల నపుడున్.261

జనవరి 05, 2014 9:50 AM

సతము బర్గర్లు నూడిల్సు చాల దినుచు
థమ్సపాదులె హితమని త్రాగుచుండు
భూజనంబుల తలపున పుచ్చకాయ,
నారికేళజలమ్ము ప్రాణమ్ము దీయు.262

జనవరి 06, 2014 5:52 AM

నిఖిలజగముల భాగ్యమ్ము నిర్ణయించు
గ్రహము లటుపైని యోగంబు లహరహమ్ము
సహకరించని కాలమ్ము సాగెనేని
నారికేళజలమ్ము ప్రాణమ్ము దీయు.263

జనవరి 06, 2014 6:11 AM

రామచంద్రుండు గురుకార్యరక్షణమున
తాటకిని జంపె, భరతుడు తపసి కనగ
నగ్రజన్ముని పాదుకలందుకొనుచు
హర్షమునుబూని త్యజియించె నందలమును.264

జనవరి 07, 2014 4:59 AM

గురుని యాజ్ఞను పొంది క్రుద్ధుడై శ్రీరాము
........డెద్దాని నేర్చినా డింతియనక?
కోరక వరియించు కువలయేశత్వంబు
........గడ్డిపోచగ ద్రోచు ఘనుడెవండు?
తనవెంట వచ్చిన దశరథాత్మజులకు
........నస్త్రవిద్యలు నేర్పు నతడెవండు?
"చూడగ" ననుటకు సూటిగా నింకొక్క
........పర్యాయ మేమందు రార్యులార?
చెప్పు డీప్రశ్న లన్నింటి కొప్పుమీర
నుత్తరంబుల నంచాడ నుత్తమముగ
చెప్పవచ్చును వరుసగా చేర్చి యిటుల
తాటకిని జంపె, భరతుడు, తపసి, కనగ.267

జనవరి 07, 2014 2:09 PM

భూతదయలేక, స్వార్థైకపూర్ణుడగుచు,
మానవత్వంబు కోల్పోయి, మత్సరించి
సతము చరియించుచుండెడి జనుడుచదువు
పాశురములను హరి యిష్టపడుట కల్ల.268

జనవరి 08, 2014 4:43 AM

పాశురములను హరి యిష్టపడుట కల్ల
కాదు, సత్యంబు మార్తాండు డాదరమున
ధనువు నందుండు మాసాన జనుడెవండు
పఠన చేయునొ సౌఖ్యంబు వానికబ్బు.269

జనవరి 08, 2014 5:25 AM

ఏడుదినముల వ్యవధిలో నింపుమీర
చేరి సద్భక్తుడౌ పరీక్షిత్తునకును
పరమపదమును జేర్చెడు భాగవతము
శుష్కవేదాంత! మును జెప్పె శుకమహర్షి.270

జనవరి 09, 2014 4:21 AM

శివనామస్మరణం బది
భవతారకమగును, మాంసభక్షణ మెపుడున్
నవరుగ్మతలకు మూలం
బవనిం దెలియంగవలయు నఘమందించున్.271

జనవరి 10, 2014 4:36 AM

వివిధములౌ జాడ్యములీ
యవనిన్ జంతువులలోన నలమిన వేళన్
చవిగొన దలచిన నిజముగ
భవతారకమగును మాంసభక్షణ మెపుడున్.272

జనవరి 10, 2014 4:50 AM

తల్లిదండ్రులు ప్రేమతో తగదటన్న
వినక, పర్ణంబులైనను తినక తపము
పట్టువీడక నొనరించి ప్రమథులకును
తండ్రినే భర్తగా బొంది తరుణి మురిసె.273

జనవరి 12, 2014 5:08 AM

రోగముల దెచ్చు పండగై భోగి వచ్చె
ననుచు పలుకుట సరికాదు మనుజుల కిల
మోదమందించు పర్వమై యాదరమున
చేర్చు తనవారి నొకచోట కూర్చు సుఖము.274

జనవరి 13, 2014 4:37 AM

కమనీయంబుగ నిత్యపద్యరచనన్ గావించు మిత్రాళికిన్,
శ్రమ యొక్కింతయు లేనిరీతి సతమున్ సన్మార్గముం జూపు నీ
ప్రముఖుల్ పండిత,శంకరార్యులకిలన్ భాగ్యంబు లందించుచున్
సమకూర్చున్ సకలాంధ్ర సజ్జనులకున్ సంక్రాంతి శ్రీ సౌఖ్యముల్ 
                                                                                    275

జనవరి 14, 2014 5:07 AM

సమతాభావము పంచుచున్, పలుకులో సభ్యత్వముం గూర్చుచున్,
మమతాగంధము నింపుచున్ హృదిని, సన్మానంబు లందించుచున్,
భ్రమలం ద్రోచుచు, హర్షదాయి యగుచున్, భాగ్యప్రదంబై సదా
సమకూర్చున్ సకలాంధ్ర సజ్జనులకున్ సంక్రాంతి శ్రీ సౌఖ్యముల్ 
                                                                                   276

జనవరి 14, 2014 5:28 AM

అయ్యదనున దుష్టాత్మక
యియ్యదియని గురుడు పలుక నింతి యటంచున్
నెయ్యము తలపక దనుజుల
తొయ్యలి దునుమాడినట్టి దొరను నుతింతున్.277

జనవరి 15, 2014 4:49 AM  

సజ్జనంబుల సన్నుతి, సత్యనిరతి,
ధర్మమార్గానుసరణంబు తగదటంచు
తలచువారికి పరనింద బలము నొసగు,
దుష్టజనముల సాంగత్య మిష్టమగును.278

జనవరి 16, 2014 5:01 AM  

కాశీపుణ్యక్షేత్రంలో మత,నామపరివర్తనలు చేయాలనే ఆకాంక్ష క్రైస్తవ సోదరులకు కలుగకుండునట్లు ఆ విశ్వనాథుడు అనుగ్రహించుగాక.

అవని నన్నింటి కంటెను హైందవులకు
కాశి యతిపవిత్రము గద, క్రైస్తవులకు
ధర్మపరివర్తనాకాంక్ష తగ్గుగాక,
వారు కన్యాకుమారిని మేరియనిరి. 279
(క్రైస్తవులు 'కన్యాకుమారిని''కన్యకామేరి'గా వాదిస్తుంటారు.)

జనవరి 17, 2014 5:04 AM

క్షేత్రరాజంబు లన్నింట క్షితిని జూడ
కాశి యతిపవిత్రముగద, క్రైస్తవులకు,
హిందు, ముస్లిము, సిక్ఖ్వాదు లందరకును
స్థానమై యొప్పునది యనుమాన మేల.280

జనవరి 17, 2014 8:47 AM

మిక్కుటమగు హర్షంబున
ముక్కంటిని దూరునెడల మోక్షము గలుగున్
గ్రక్కున రండని మూర్ఖుం
డొక్కడు తా బిలుచుచుండె నూరిజనమ్మున్. 
                                                            281

ఇక్కట్టులు గలిగెడు భువి
ముక్కంటిని దూరునెడల, మోక్షము గలుగున్
మిక్కుటమగు యశమబ్బును
నిక్కము, కీర్తింతురేని నిష్ఠాగరిమన్.282

జనవరి 18, 2014 4:50 AM

అక్కజము గొల్పు మాటలు
"ముక్కంటిని దూరునెడల మోక్షము గలుగున్,
మ్రొక్కిన సౌఖ్యమడంగెడు
నిక్కుంభినిలోన"ననుట యెక్కాలమునన్.283

జనవరి 18, 2014 2:01 PM

వివిధములౌ ధర్మములకు
నవరసములు చేర్చి కవులు నవ్యత గూర్చన్
భువిపయి సందేహాస్తో
క వినాశన మయ్యె మేటి కావ్యము చేతన్284

జనవరి 19, 2014 4:38 AM

కవనంబున సుఖసంతతి,
కవనంబున ధనము, శుభము, ఘనయశములిలన్
కవులందియున్నవా రే
కవి నాశనమయ్యె మేటి కావ్యముచేతన్?285

జనవరి 19, 2014 7:04 PM

మనమున గట్టిపట్టుదల, మాటలలోన తదేకదీక్షతో
ననయము కార్యసాధనకు యత్నము చేసినవారి కిమ్మహిన్
ధనము, సుఖంబులబ్బుటది తథ్యము, సద్యశ మందవచ్చు నా
ఘనమృగతృష్ణలోన నుదకంబులు ద్రాగుట సాధ్యమే సుమా!
                                                                             286

జనవరి 20, 2014 4:51 AM

శిక్షణ నందకుండ, పరిశీలన చేయక కావ్యశాస్త్రముల్
సాక్షరుడై వెలుంగకయు, సంతత మెల్లెడ మద్యపానమే
దీక్షగ బూనువాడొకడు తెల్పెను మిత్రుల కొక్కచోనిటుల్
రాక్షస వంశ సంభవుడు రాముడు రావణు గన్నతండ్రియే.287

జనవరి 21, 2014 4:55 AM

పోడిమిగల శిష్యునకును,
వీడక జీవితమునందు విస్తృతయశముల్
జోడించిన సత్పుత్రున
కోడినవారలకు దృప్తి యొనగూడు గదా!288

జనవరి 22, 2014 4:46 AM

భూతదయను వీడి ఖ్యాతిగా భావించి
కోట్లు దినుట నేర్చె, కుక్కుటములు
హయములాది ప్రాణు లాటవస్తువులట్లు
తలచుచుండి జనుడు ధరణిలోన.289

జనవరి 23, 2014 6:02 AM

మమతం జూపుచు సతతం
బమలినభావంబుతోడ నాదరమొప్పన్
తమవా రందించెడి సా
యము నిష్టపడంగ నొప్పు నఖిలప్రాణుల్.290

జనవరి 24, 2014 4:10 AM

సమతా దృక్పథమున తర
తమభేదంబులను వీడి ధరవారలకున్
మమతం బంచెడిదౌ న్యా
యము నిష్టపడంగ నొప్పు నఖిలప్రాణుల్.291

జనవరి 24, 2014 4:25 AM

తమతమ వాగ్దానంబుల
గ్రమముగ నాచరణ జూపు ఘననాయకస
త్తములగు వారల యా ధ్యే
యము నిష్టపడంగ నొప్పు నఖిలప్రాణుల్.292

జనవరి 24, 2014 4:54 AM
అతిశయోక్తులు, హాస్యంబు, లద్భుతములు
పలుకవలసిన స్పర్థలో బాలుడొకడు
పలికె యమునకు కర్ణుండు బావ మరియు
కుంభకర్ణుండు రూపసి కుంతిమగడు.293
నాగపురమున భారత నాటకమున 
కుంభకర్ణాఖ్యు డొక్కడు కూర్మిమీర
నటన చేయగ జేరెను నమ్ముడందు
కుంభకర్ణుండు రూపసి కుంతిమగడు.294

చదువు నేర్వగ వచ్చెను ఛాత్రు డొకడు,
గురుడు నాతని సామర్ధ్య మరయ దలచి
ఉక్తలేఖనమందున నొసగెనిట్లు
కుంభకర్ణుండు, రూపసి, కుంతి, మగడు.295

జనవరి 25, 2014 5:08 AM  

చోరకళాప్రవీణులును, సోదరభావము లేనివారలున్కోరికమీర నిత్యమును కోట్లు గడించుట యేకలక్ష్యమై
నేరపరాయణత్వమున నిష్ఠనుబూనెడు నేతలుండగా
భారతదేశ మొక్కటిగ వర్ధిలు మాట యసత్యమే కదా!296

మారము మేమటంచు పలుమారులు చెప్పిన 
                             మానమింక మే
మూరక నుండబోమనుచు నున్మద చిత్తము 
                             బూని దేశమున్
కోరికదీర ముక్కలుగ కోసెడి వారలు నిండియుండగా
భారత దేశ మొక్కటిగ వర్ధిలు మాట యసత్యమే కదా!297

కారణజన్ము లాఘనులు గాంధి 
                       రచించిన మార్గమందుచున్
పోరిరి ధన్యులైరిగద! పూర్వమటంచును 
                       పర్వవేళలో
చేరి యుపన్యసించెదరు, చేయరొకింతయు 
                       దేశసేవయున్
భారతదేశ మొక్కటిగ వర్ధిలు మాట యసత్యమే కదా!298

జనవరి 26, 2014 6:13 AM  
భయముగొల్పె నాడు భస్మాసురాఖ్యుండు, 
త్రోసె కుక్షిలో గజాసురుండు
దుష్టు లసురజాతి దుర్మార్గచరులౌచు
శివునినైన గాసి చేయగలరు.299

జనవరి 27, 2014 6:41 AM   

శార్జ్గ్యర్పితమానసమునశార్జ్గ్యారాధనము కూల్చు సకలాఘములన్
శార్జ్గ్యైశ్వర్యప్రదుడిక
శార్జ్గ్యంఘ్రిస్మరణవలన సద్గతి గలుగున్  300

జనవరి 28, 2014 4:30 AM